ခြေတစ်လှမ်းသည် ဘ၀တစ်ခု၏ အောင်မြင်မှု၊ ရှုံးနိမ့်မှုအတွက် အဆုံးအဖြတ်ကို ကိုယ်စားပြုပါတယ်။ ခြေတစ်လှမ်း၏ အနှေးအမြန်ကို လိုက်ပြီးခရီးကိုလည်း ပြောင်းလဲ ရေတွက်နိုင်သလို၊ ဘ၀အတွက်ကြိုးစားနေတဲ့ လူတွေအတွက်လည်း ပထမခြေလှမ်းဟာ အရေးကြီးပါတယ်။ ပထမခြေလှမ်းကို စတင်ရန်အင်းအားသည် အင်မတန်ခက်ခဲတဲ့ အရာတစ်ခုပါ။ အကြောင်းကား ဘ၀တစ်ခုရဲ့ အနိမ့် အမြင့်ကို ဆုံးဖြတ်နိုင်စွမ်းရှိလို့ပါပဲ။ ဘ၀တစ်ခုမှာ အိပ်တစ်ချက် နိုးတစ်ဝက်နဲ့ အိပ်ရေးပျက်ခဲ့တဲ့ ညတွေရှိခဲ့သလို အချိန်မှန်လိုက် အချိန်မမှန်လိုက်နဲ့ ရွာသွန်းနေတဲ့ မိုးလိုပဲ ဘ၀မှာလည်း ပျော်ရွှင်လိုက် ပျင်းရိလိုက် အချိန်တွေနဲ့ နပန်းလုံး နေလိုက်ရတာ စာရေးသူဘ၀အတွက် အခုအချိန်ထိပါပဲ။ အနိစ္စတရားရဲ့ အနားသတ်မျဉ်းကြောင်းကို တဖြည်းဖြည်းရောက်လို့ ရောက်နေမှန်းမသိတဲ့ အတွေ့အကြုံနုနယ်ပြီး လောကအလယ်ကို မသိမသာနဲ့ ကိုယ်ကိုယ်တိုင် ရောက်နေတာ မသိလိုက်ရဘဲ လောကကြီးရဲ့ ကြိုးဝိုင်းအောက်မှာ ကျီစယ် (လောင်ပြောင်)မှုကို ကောင်းကောင်း နားမလည်းနိုင် သေးပါ။
မွန်းကြပ်လွန်းတဲ့ စိတ်ကူးယဉ်အိပ်မက်ကို သွားနေရတာ တကယ့်ကို စွန့်စားခန်းတစ်ခုကို ကျော်ဖြတ်နေရသလိုပဲ တွေးကြည့်ရပြန်တော့လည်း တကယ့်ကို ရင်မောတယ်။ ဘ၀ဟာ ဘယ်လိုပုံစံ မှန်းမသိသေးတဲ့ ကံကြမ္မာပန်းပုဆရာလက်အောက်မှာ အခုထိရုပ်လုံးမကြွနိုင်သေးပါဘူး။ လူတွေပြောနေကြတဲ့ လောကဓံဆိုတာ လူဆိုးလား လူကောင်းလား အခုထိ ကောင်းကောင်း မတွေးဖူးသေးတော့ ဖြူလား မဲလား ဆိုတာလည်း အခုထိတိုင် ကောင်းကောင်း သဘောမပေါက်နိုင်သေးပါ။ သေချာတာတစ်ခုက ဘီလူးကို ပုံသွင်းသလို ဘီလူးကတော့ ချစ်စရာအရုပ်ကလေး ဖြစ်လာနိုင်စရာ မရှိဘူးလို့ ထင်တယ်။ ဘ၀ကို ဘယ်လိုဘယ်ပုံရှိမှန်း ရုပ်လုံးမပေါ်ပဲ ဖြတ်သန်းနေရသူအတွက်တော့ ခေတ်စကားနဲ့ပြောရင် တစ်မျိုးတော့ ရင်ခုန်စရာကောင်းပါတယ်။ ဘာဖြစ်လို့ဆိုတော့ ပြိုင်ပွဲဆုံးအောင် ရင်ခုန်စရာကောင်းလို့ပါပဲ။ ကိုယ်မှန်းတဲ့ နေရာကို မရောက်ခဲ့ပဲ ရှုံးနိမ့်သွားတဲ့ သူတွေလည်း လောကမှာ မရေတွက်နိုင်အောင်ပါဘဲ။ ကိုယ်မှန်းတဲ့နေရာကို ရောက်ပြီး ကိုယ့်ရည်မှန်းချက်ကို အကောင်အထည်မဖော်နိုင်တဲ့ သရေပွဲနဲ့ ကျေနပ်ခဲ့တဲ့ သူတွေလည်း လောကမှာ အများကြီးပါ။ ကိုယ်မှန်းတဲ့ နေရာကို ရောက်ပြီး ကိုယ့်ရည်မှန်းချက်ကို အကောင်အထည်ဖော် နိုင်တာ လောကမှာ ရေတွက်လို့ရပါတယ်။
သတ္တ၀ါခပ်သိမ်း၊ တရားငြိမ်း၊ အေးချမ်းသာယာရှိပါစေ။ ။
