မြတ်စွာဘုရားရှင်သည် သတ္တ၀ါအားလုံးအကျိုးစီးပွားများစေရန် ပွင့်ထွန်းပေါ်ပေါက်တော်မူလာရသည်။ မိမိတစ်ဦးတည်း အကျိုးအတွက်ဆိုရပါမူ မြတ်ဘုရားရှင်သည် ဖလသမာပတ်ဝင်စား၍ ချမ်းသာစွာနေတော်မူနိုင် သော်လည်း နေတော်မမူအား သတ္တ၀ါများအတွက် မနေမနားကြိုးစားတော်မူခဲ့သည်။ ဘုရားရှင်၏ နေ့စဉ်လုပ် ငန်း ကိုလေ့လာကြည့်လျှင်ပင် သိနိုင်မည်ဖြစ်၏။
တနေ့တာအချိန်ကို ငါးပိုင်းပိုင်း၍ သူ့အချိန်နှင့်သူ မလစ်လပ်စေရအောင် နေ့စဉ်နှင့်အမျှ ဆောင်ရွက် တော်မူသည်။ နံနက်ခင်းလုပ်ငန်း၊ဆွမ်းစားပြီးချိန်လုပ်ငန်း၊ ညဥ့်ဦးယံလုပ်ငန်း သန်းခေါင် ယံလုပ်ငန်း၊ မိုးသောက်ယံလုပ်ငန်းဟူ၍ တစ်နေ့တာ ဆောင်ရွက်ဖွယ် လုပ်ငန်းစဉ်များကို ငါးပိုင်းပိုင်း၍ နေ့စဉ် ဆောင်ရွက်တော်မူသည်။
မြတ်စွာဘုရားရှင်သည် အရုဏ်တက်ချိန်စောစော အိပ်ရာမှထတော်မူ၍ မျက်နှာသစ်ခြင်း ကိုယ်လက် သုတ်သင်ခြင်းကို ပြုတော်မူသည်။ ထို့နောက် ဂန္ဓကုဋီတိုက်ခန်းသို့ ပြန်လည်ဝင်တော်မူပြီး သမာပတ်ဝင်းစား ကာ ခဏမျှချမ်းသာစွာ နေတော်မူသည်။ ထို့နောက် ဆွမ်းခံချိန်ရောက်သောအခါ သင်္ကန်းတော်ကို ရုံတော်မူ ပြီး တစ်ခါတစ်ရံ တစ်ပါးတည်း တစ်ခါတရံ သံဃာတော်များခြံရံလျှက် ဆွမ်းခံကြွတော်မူသည်။ ထိုသို့ ကြွတော် မူသောအခါ၌လည်း တစ်ခါတရံ တန်းခိုးအမျိုးမျိုး ဖန်ဆင်း၍လည်းကောင်း တစ်ခါတရံ ပကတိ သဘာဝအတိုင်း လည်းကောင်း ကြွတော်မူသည်။
မြတ်စွာဘုရားကြွတော်မူလေရာတိုင်း ပါရမီတော်ကြောင့် ခလုတ်တံသင်း ဆူးငြှောင့် နှောင့်ယှက်ခြင်း မရှိ ကမူချိုင့်ဝှမ်း နိမ့်မြင့်မညီဖြစ်နေသောလမ်းများလည်း အလိုလိုချောမွေ့ပြေပြစ်၍ သွားကြ၏။ ဒကာ ဒကာမ တို့မှလည်း မိမိတို့တတ်နိုင်သလောက် သံဃာတော်များ တောင်းယူပင့်ဆောင်ကြကုန်လျှက် မြတ်စွာဘုရား၏ သံပိတ်တော်ကို ယူဆောင်ကာ နေရာတော်ခင်း၍ ရိုသေစွာ ဆွမ်းလုပ်ကျွေးကြကုန်၏။ ဆွမ်းဘုဉ်းပေးပြီးနောက် မြတ်စွာဘုရားသည် ဒကာ ဒကာမတို့၏ စရိုက်ဓာတ်ခံကို ဆင်ခြင်တော်မူလျှက် သင့်လျော်သော အနုမောဒနာ တရားဟောကြားတော်မူသည်။
ထို့နောက် မြတ်စွာဘုရားရှင်သည် ကျောင်းတော်သို့ ပြန်ကြွကာ နံ့သာပန်းတို့ဖြင့် ထုံမွမ်းထားသော စုဝေးရာမဏ္ဍပ်နေရာတော်၌ ထိုင်တော်မူ၍ ဆွမ်းစားရာမှ ပြန်လာကြသော ရဟန်းတော်တို့ကို စောင့်လျှက်နေ တော်မူ၏။ ရဟန်းတော်များစုံလင်သောအခါ ဂန္ဓကုဋီကျောင်းဆောင်တော်သို့ ကြွတော်မူလေသည်။ ဤသို့ နေ့စဉ် နံနက်တိုင်းလုပ်လုပ်ငန်းစဉ်ကို လုပ်ဆောင်တော်မူခဲ့သည်။
မြတ်စွာဘုရားသည် နံနက်ခင်းကိစ္စ ပြီးဆုံးသည့်နောက် နေ့လည်လုပ်ငန်းစဉ်အဖြစ် ဂန္ဓကုဋီကျောင်း တော်အနီး အသင့်ခင်းထားသော နေရာ၌ ထိုင်တော်မူပြီး ခြေဆေးအင်းပျဉ်၌ ရပ်တော်မူလျှက် ရဟန်းတော်များ အား ဒုလ္လဘတရားငါးပါးကို နေ့စဉ်ဟောကြား သတိပေးတော်မူမြဲဖြစ်သည်။῾῾ရဟန်းတို့ မမေ့လျော့သောသတိ တရားနှင့်နေကြ။ လောက၌ မြတ်စွာဘုရားပွင့်ထွန်းတော်မူခြင်းသည် ဖြစ်ပေါ်ခဲပေ၏ ၊ လူအဖြစ်ကိုရခြင်းသည် ခက်ခဲပေ၏၊ သဒ္ဓါတရားနှင့်ပြည့်စုံခြင်းသည် ခက်ခဲပေ၏၊ ရဟန်းအဖြစ်ကိုရခဲပေ၏၊ သူတော်ကောင်းတရားကို နာကြားရဖို့ခက်ခဲပေ၏᾿᾿။ ဒုလ္လဘတရားဟောကြား သတိပေးပြီးလျှင် ကမ္မဋ္ဌာန်းမေးလျှောက်သော ရဟန်းတို့အား သင့်လျှော် သောကမ္မဋ္ဌာန်းကို ပေးတော်မူသည်။ ကမ္မဋ္ဌာန်းသင်ယူပြီးသော ရဟန်းတော်များ မိမိတို့နှင့် သင့်လျှော်သော ဆိတ်ငြိမ်ရာသို့ အသီးသီးကြွရောက်၍ ကမ္မဋ္ဌာန်းတရားပွားများအားထုတ်ကြလေသည်။
ကမ္မဋ္ဌာန်းပေးပြီးနောက် ဂန္ဓကုဋီကျောင်းတော်သို့ဝင်တော်မူကာ အလိုတော်ရှိလျှင် ခေတ္တခဏကျိန်းစက် တော်မူသည်။ ကျိန်းစက်ရာမှ ထတော်မူပြီးလျှင် တစ်လောကလုံးကို ခြုံ၍ ချေချွတ်ထိုက်သော သတ္တ၀ါဝေနေယျ များရှိ - မရှိ အမြဲရှုကြည့်တော်မူလေသည်။ မြတ်စွားဘုရား သီတင်းသုံးရာဒေသရှိ ဒကာ ဒကာမတို့သည် ညနေချမ်းကာလရောက်လျှင် အဖျော် ယမကာ ပန်းနံ့သာစသည် ယူဆောင်လျှက် တရားနာယူရန် ကျောင်းတော်သို့ ရောက်လာစည်းဝေးကြသည်။ ထိုအခါ မြတ်စွာဘုရားသည် တရားနာမဏ္ဍပ်ရှိနေရာတော်၌ သီတင်းသုံးတော်မူလျှက် သင့်လျှော်သောတရားကို ဟောကြားတော်မူလေသည်။
မြတ်စွာဘုရားရှင်သည် တစ်နေ့တာ ဆောင်ရွက်ဖွယ်လုပ်ငန်းများပြုလုပ်ပြီးနောက် ရေချိုးတော်မူလိုလျှင် ရေချိုးအိမ်သို့ဝင်တော်မူကာ ရေသပ္ပါယ်တော်မူသည်။ အလုပ်ကျွေးရဟန်းကလည်း ဘုရားရှင်နေရာတော်ကို ဂန္ဓကုဋီပရိဝုဏ်အတွင်း၌ ခင်းထားရလေရာ ရေသုံးသပ်တော်မူပြီးလျှင် ထိုနေရာသို့ ကိုယ်ရုံလက်ကန်တော့ထိုး တော်မူလျှက် တစ်မုဟုတ်ခန့်မျှ တစ်ပါးတည်း ကိန်းအောင်းစံနေတော်မူလေသည်။ ခဏကြာလျှင် ထိုထိုအရပ်မှ ရဟန်းတော်များ လာရောက်ဆည်းကပ်ကြကုန်၏။ မြတ်စွာဘုရားသည် ညဥ့်ဦးယံတစ်ချိန်လုံး ထိုရဟန်းတော်များ မေးလျှောက်သမျှ ဖြေဆိုတော်မူ၍ တရားဓမ္မ ဟောပြပေးတော်မူ၏။ ဤသို့ဖြင့် ညဥ့်ဦးယံ အချိန်များကုန်လွန်သွား၏။
ညဥ့်ဦးတံလုပ်ငန်းပြီးဆုံး၍ ရဟန်းတော်များ ပြန်ကြွပြီးသောအခါ နတ်ဗြဟ္မာတို့ဆည်းကပ်ရန် အချိန်ဖြစ် တော့သည်။ စကြာဝဠာတိုက်တစ်သောင်း၌ နေကြကုန်သော နတ်ဗြဟ္မာတို့သည် မိမိတို့ဆင်ခြင်စဉ်းစားခဲ့ကြ သော အမေးပုစ္ဆာပြဿနာများကို မေးလျှောက်ကြကုန်၏။ မြတ်စွာဘုရားသည် သန်းခေါင်ယံတချိန်လုံး အမေး ပုစ္ဆာပြဿနာအလိုက် နတ်ဗြဟ္မာတို့ သံသယ ပြေကင်းအောင် ဖြေရှင်းဟောပြတော်မူရလေသည်။ မိုးသောက်ယံကိုကား သုံပိုင်းခွဲဝေတော်မူလျှက် ကျင့်ဆောင်တော်မူလေသည်။ တစ်နေ့တာလုံး ဆောင် ရွက်တော်မူရသဖြင့် ကိုယ်လက်ပင်ပန်း နွမ်းနယ်မှုပြေပျောက်စေရန် ပထမပိုင်းတစ်ချိန် စင်္ကြံကြွခြင်းဖြင့်ကုန် လွန်စေသည်။ ဒုတိယပိုင်းတစ်ချိန်မှာမူ ဂန္ဓကုဋီကျောင်းတော်သို့ဝင်၍ လက်ယာနံတောင်းဖြင့် လျောင်းစက်တော် မူသည်။
တတိယပိုင်း အချိန်လျောင်းတော်မူရာမှ ထတော်မူပြီးလျှင် ထက်ဝယ်ဖွဲ့ခွေထိုင်နေတော်မူကာ ရှေးရှေး ဘုရားရှင်တို့အထံ၌ ဒါန သီလ စသည်ပြုခဲ့ဖူးသောကုသိုလ်ပါရမီထူး ရှိသူများ ရှိ-မရှိ တစ်လောကလုံးကို ခြုံငုံ ၍ကြည့်ရှု့တော်မူလေသည်။ ဤသို့ဖြင့် ၂၄ နာရီတွင်း ၁ နာရီကျော်ခန့်သာ ကျိန်းစက်တောမူလျှက် တနေ့တာလုပ်ငန်းစဉ်တို့ကို နေ့စဉ်လုပ်ဆောင်တော်မူပြီး အချိန်မှန် အလုပ်လုပ်ခြင်း၏ တန်ဖိုးကို ပြတော်မူခဲ့သည်။
No comments:
Post a Comment