မိမိလူမျိူး ပတ်ဝန်းကျင်၌ ကိုးကွယ်ပူဇော်ကြသည့် ဘုရားပုထိုးစေတီ စသောဘာသာရေး အဆောက်အဦး ပရ၀ုဏ်အတွင်းတွင် တံခွန်ကုက္ကား အလံတွေနဲ့အတူ တွဲပြီးတွေ့ရတာကတော့ ဟင်္သာ၊ ခြင်္သေ့၊ဗျာလ -စသော ဒဏ္ဍာရီဆန်ဆန် အထိမ်းအမှတ် သင်္ကေတ ရုပ်ထုများကို တွေ့ရပါသည်။ ထိုအထဲတွင် ဗျာလလည်း တစ်ခုအပါအ၀င် ဖြစ်လေသည် ကမ္ဘာစကတည်းက လူမျိူးတိုင်း ဘာသာတိုင်း၌ ၄င်းလူမျိုးတို့၏ ဒဏ္ဍာရီ ဆန်သော အထိမ်းအမှတ် သင်္ကေတ ရုပ်ထုများရှိခဲ့ကြသည်။ အလားတူပင် ရခိုင်လူမျိုး၌လည်း ဒဏ္ဍာရီဆန်သော အထိမ်းအမှတ် သင်္ကေတရုပ်ထုတစ်ခုရှိသည်။ ၄င်းမှာ ဗျာလ ဖြစ်သည်။ သို့ဖြစ်ပါသောကြောင့် ဗျာလ အကြောင်းကို သိသလောက် အနည်းငယ် တင်ပြလိုက်ပါတယ်၊ အများသိတဲ့အတိုင်း “သဇင်ပန်းခိုင် တမြိုင်မြိုင် ရခိုင်ဘုရားပေါင်း ” ဆိုပင်ဆိုငြင်းသော်လည်း လမ်းပန်းဆက်သွယ်ရေး အခက်အခဲကြောင့် လူရောက်နည်းပါးမှုမှာ မှန်သော်လည်း ဘုရားပုထိုး စေတီများမှာ ယနေ့တိုင် ရှေးဟောင်း ယဉ်ကျေးမှု အမွေအနှစ် အဖြစ်ရပ်တည်နေသည်မှာ အမှန်ပင်ဖြစ်သည်။ “လှည်းဝင်ရိုးသံ တညံတညံ ပုဂံ ဘုရားပေါင်း ” လောက် လူသိများပါခဲ့ဘူး။ ဒါကြောင့် ၄င်းဗျာလ ရုပ်ထုကို ကမ္ဘာကပင် မဆိုထားနှင့် မြန်မာနိုင်ငံ၌ပင် လူအတော်များများ မသိရှိကြသေးပေ။ ရခိုင်ဒေသ၌ ၄င်းဗျာလ ရုပ်ထုကို ရှေးဟောင်းစေတီပုထိုးများ၏ ကျောက်ဆစ်လက်ရာများတွင် ပုံသဏ္ဍာန် အမျိုးမျိုးရှိသော ရှေးဟောင်းလက်ရာ အမွေအနှစ်အဖြစ် တွေ့ရှိနိုင်ပါသည်။ ၄င်း သတ္တ၀ါကို ရခိုင် လူမျိုးတို့က “ ဗျာလ ” ဟုခေါ်ဆိုခဲ့ကြသည်၊ အဆိုပါ ဗျာလမှာ ရခိုင် လူမျိုးတို့၏ ရှေးရိုးစဉ်ဆက် တစ်လျှောက်ရှိခဲ့သော ဒဏ္ဍာရီဆန်သော သတ္တ၀ါဖြစ်သည်။ ၄င်း “ဗျာလ” ကို သီချင်း ကဗျာ ရသ အမျိုးမျိုး ခံစားရေးဖွဲ့ သီကုံးကြသည်။ ရခိုင်ဘုရင် အဆက်ဆက် ဗျာလရုပ်ထုဖြင့် စေတီ ပုထိုး၊ လိုင်ဂူ၊ မြို့ရိုး ပြသဒ် နန်းတော်တွေကို အလှဆင်ကြသည်၊ ၄င်း ဗျာလကို သတ္တ၀ါ ကိုးမျိူး၏ ကောင်းမြတ်သော ခွန်အား စွမ်းအင် ရှိသော သတ္တ၀ါတို့၏ အစိတ်အပိုင်းများနှင့် ပေါင်းစပ်ထားသည်။ ယင်းသို့ သတ္တ၀ါ ကိုးမျိုး၏ အစိတ်အပိုင်းများနှင့် ပေါင်းစပ်ထားခြင်းကြောင့် “န၀ ရူပ ဗျာလ ” လည်း ခေါ်သည်။ အဆိုပါ “န၀ ရူပ ဗျာလ” ရုပ်တွင် ပါရှိသည့် သတ္တ၀ါကိုးမျိုး၏ အစိတ်အပိုင်းများမှာ- ၁။ ခြင်္သေ့ ခြေ၊ လက်
၂။ ဆင် နှာမောင်း
၃။ သမင် မျက်လုံး
၎။ မြင်း နားရွက်
၅။ ကြက်တူရွေးလျှာ
၆။ စာမရီ အမြီး
၇။ ကျား ပါးစပ်
၈။ ကြံ ချို
၉။ ခြူး (ငါးကြင်း)ကိုယ် တို့ဖြစ်သည်။
ထို့ကဲ့သို့ ထူးခြားသော စွမ်းအင်ရှိသည့် အစိတ်အပိုင်းများကို တစ်ကောင်းတည်း ဖြစ်အောင် ပေါင်းစပ် ထားခြင်းမှာလည်း ဗျာလ၏ ထူးခြားမှုကို ရည်ညွန်းထားသည့် အဓိပ္ပါယ်ဖြစ်သည်။ ဗျာလတွင်ပါရှိသည့် အစိတ်အပိုင်းများ အနက် ကြက်တူရွေးလျှာသည် စကားပရိယာယ် ကြွယ်ဝခြင်း လည်းကောင်း၊ ဒေါင်းအမြီးသည် လှပတင့်တယ်ခြင်းကို လည်းကောင်း၊ မြင်း နားရွက်သည် အကြားအာရုံ ထက်မြတ်ခြင်းကို လည်းးကောင်း၊ သမင် မျက်စိသည် အမြင်အာရုံ စူးရှခြင်းကို လည်းကောင်း၊ ခြူးတို့၏ ကိုယ်ထည်သည် လျင်မြန် ဖျက်လတ်ခြင်းကို လည်းကောင်း၊ ကြံ့ ချို၊ ခြင်္သေ့၊ လက်ဝါး၊ ဆင်နှာမောင်းတို့သည် စွမ်းအင်ကြီးမာခြင်းတို့ကို လည်းကောင်း အသီသီး ကိုယ်စားပြုပါသည်။ အဆိုပါ သတ္တ၀ါ ကိုးမျိုးတို့၏ အစိတ်အပိုင်းဖြင့် တန်းဆာဆင်အပ်သော သတ္တ၀ါအား ထားရှိခြင်းဖြင့် “အဗျာလော- ဘေးအပေါင်း ကို မဖြစ်စေတတ်ဘဲ၊ လာလော- လာဘ်လာဘကိုသာ ဖြစ်စေတတ်၏ ” ဟု ရခိုင်လူမျိုးတို့ ယုံကြည်ထားကြသည်။ ဗျာလကို ရခိုင် ဝေသာလီခောတ် သာသနိက အဆောက်အအုံများတွင် စတင်တွေ့ရှိရသည်။ ယင်းထက် ရှေးကျသော ရုပ်ထုများလည်း ရှိကောင်းရှိနိုင်ပါသေးသည်။ မင်္ဂလာအခမ်းအနားများ၌ သုံးစွဲသော အသုံးအဆောင် ပစ္စည်းများတွင် အနည်းငယ် တွေ့ရှိရပါသည်။ ရခိုင်လူမျိုးတို့၏ ရှေးဟောင်း အထိမ်းအမှတ် တစ်ခုဖြစ်သော “န၀ ရူပ ဗျာလ” ကို ကျောင်းကန်၊ စေတီ ပုထိုးများတွင် လည်းကောင်း၊ ထင်ရှားသော အဆောက်အဦးများတွင် လည်းကောင်း စွမ်းအင်ကိုးမျိုး ပေါင်းစု ထားသော အစောင့်အရှောက် သတ္တ၀ါအဖြစ် ထားလေ့ရှိပါသည်။ ။
No comments:
Post a Comment